Qaysi sut sog‘gich yaxshiroq – qo‘lda ishlaydiganmi yoki elektrda?

Sut sog‘uvchi moslama tug‘ruqdan oldingi majburiy xaridlar ro‘yxatiga kirmaydi. U sizga kerak bo‘lishi ham, kerak bo‘lmasligi ham mumkin: emizish jarayoni qanday kechishini oldindan aytib bo‘lmaydi. Agar laktatsiya boshlanishi bilan sut juda ko‘p miqdorda hosil bo‘lsa va to‘planib qolish xavfi tug‘ilsa yoki qandaydir sabablarga ko‘ra sutni sog‘ib, keyingi emizishlar uchun (muzlatkichda) saqlash zarur bo‘lsa, bu foydali moslamani sotib olish haqida o‘ylab ko‘rish lozim.

Elektrda yoki qo‘lda ishlaydigan asbobni tanlash aniq vaziyatlarga bog‘liq bo‘ladi. Aynan sizga qaysi variant mos kelishini aniqlash uchun har bir turdagi asbobning o‘ziga xos xususiyatlarini yaxshilab o‘rganib chiqish lozim.

Sut sog‘uvchi moslamaning vazifasi chaqaloqning o‘rniga ko‘krakni sutdan bo‘shatishdir. Uning ishlash tamoyili tabiiy emish jarayonini taqlid qilishga asoslangan. Moslama ritmik ravishda vakuum hosil qilib, xuddi och go‘dakdek sut kelishini rag‘batlantiradi. Lekin, tabiiy jarayon bilan mexanik sog‘ish o‘rtasida muhim farq mavjud – chaqaloq sutni faqatgina so‘rib olmaydi, balki ko‘krakni muloyimlik bilan uqalaydi va, shubhasiz, onada mexanik moslamaga qaraganda ko‘proq his-tuyg‘ular uyg‘otadi. Bu esa sut ajralishiga bevosita ta’sir ko‘rsatadigan oksitotsin gormoni ishlab chiqarilishiga yordam beradi.

Bugungi kunda ushbu tabiiy jarayonga yaqin ishlaydigan moslama modelini yaratishga harakat qilinmoqda. Yaxshi (zamonaviy) sut sog‘gich avvaliga oksitotsin ishlab chiqarilishini rag‘batlantirish uchun tez va yuzaki emishni taqlid qiladi, so‘ngra esa chuqurroq va sekinroq harakatlarga – bevosita sog‘ishga o‘tadi.

Qo‘lda ishlaydigan modellar avlodlar sinovidan o‘tgan klassika hisoblanadi. Bunday moslamaning asosiy afzalligi elektr manbasiga mutlaqo bog‘liq emasligidir. Siz xohlagan joyingizda: shifoxona palatasida, mehmon bo‘lganingizda, hatto mashinada ham sut sog‘ishingiz mumkin. Ixchamligi tufayli bunday moslamani o‘zingiz bilan osonlikcha olib yurasiz, tuzilishining soddaligi esa uni uzoq vaqt xizmat qiladigan ko‘makchiga aylantiradi. Ammo buning ikkinchi tomoni ham bor. Qo‘lda sog‘ishda talab qilinadigan jismoniy kuch, ayniqsa muntazam ravishda amalga oshirilsa, charchoqqa olib kelishi mumkin. Bunday modellarning tezligi va samaradorligi odatda elektr bilan ishlaydigan turlariga qaraganda pastroq bo‘ladi. Ammo ko‘plab onalar qo‘lda ishlaydigan sut sog‘gichlarni ta’sirining yumshoqligi va jarayonni to‘liq nazorat qila olish imkoniyati tufayli ma’qul ko‘rishadi.

Elektrda ishlaydigan modellar – sutni tez-tez yoki ko‘p miqdorda sog‘adigan onalar uchun eng maqbul tanlov. Ular avtomatik tarzda ishlaydi, qo‘llaringizni bo‘shatib, kuchingizni tejaydi. Zamonaviy moslamalar turli xil sog‘ish dasturlari, kuch va tezlikni sozlash imkoniyatini taqdim etadi, bu esa jarayonni iloji boricha tabiiy qiladi. Ayniqsa, ikki tomonlama sog‘adigan modellar juda qulay – ular nafaqat vaqtni tejaydi, balki sut ishlab chiqarishni yaxshilashga ham yordam beradi. Biroq, bu qulaylik uchun to‘lov talab etiladi: elektrda ishlaydigan sut sog‘uvchi qurilma qimmatroq, hajmi ham kattaroq bo‘lib, elektr manbaiga ulanishi yoki batareyalar bilan ishlashi kerak.

Qo‘lda ishlaydigan yoki elektr modelini tanlash sizning turmush tarzingiz va ehtiyojlaringizga bog‘liq. Agar sut sog‘ish faqat ba’zida - ozgina sog‘ilgan sutni saqlab qo‘yish yoki kutilmagan vaziyatlarga tayyorgarlik uchun kerak bo‘lsa, qo‘lda ishlaydigan moslama tejamkor va qulay yechim bo‘ladi. Bundan tashqari, u laktostaz holatida ham foydali, chunki sutning bir joyda to‘planib qolishi holatida aynan o‘sha joydagi sutni tortish va ehtiyotkorona sog‘ishni ta’minlashi mumkin. Albatta, cheklangan budjet sharoitida bu variant eng arzon tanlov bo‘ladi.

Elektr modeli ishga chiqish paytida muntazam sog‘ishni rejalashtirgan onalar, shuningdek egizaklar yoki muddatidan oldin tug‘ilgan chaqaloqlarni emizayotgan onalar uchun yanada qulayroq variant hisoblanadi.

Xarid qilayotganda quyidagi xususiyatlarga e’tibor qarating:

1. Voronka o‘lchami – ko‘krak kattaligiga mos kelishi shart.

2. Materiallar – faqat bisfenol-A (BPA-free) saqlamaydigan xavfsiz plastmassadan tayyorlangan bo‘lishi kerak..

3. Sog‘ish kuchini boshqarish imkoniyati mavjud bo‘lishi lozim.

4. Voronkada massaj yostiqchasi bo‘lishi kerak.

5. Turli xil ish rejimlaridan foydalanish imkoniyati bo‘lishi zarur.

6. Yig‘ish va parvarish qilish oson bo‘lishi kerak.

Imkoni bo‘lsa, sotib olishdan oldin sut sog‘gichni sinab ko‘rishdan tortinmang. Qulaylik har kim uchun o‘ziga xos tushuncha bo‘lgani sababli, faqat tashqi ko‘rinishiga qarab qurilmaning sizga mos kelishini aniqlash qiyin.

Sut sog‘uvchi moslamaning qanday turda ekanligidan qat’iy nazar, gigiyena qoidalariga rioya qilish majburiydir. Sut bilan aloqada bo‘ladigan barcha qismlarni har safar ishlatgandan so‘ng puxta yuvish va muntazam ravishda sterillash lozim. Klapanlar va membranalarga alohida e’tibor qarating - ularning eskirishi sut sog‘ish samaradorligini sezilarli darajada pasaytiradi.

Internetda yoki tanishlaringiz orasida sut sog‘gichdan foydalanish bilan bog‘liq keng tarqalgan xato fikrlarni uchratishingiz mumkin. Keling, ularning qanchalik to‘g‘ri ekanligini ko‘rib chiqaylik:

• «Elektrda ishlaydigan sut sog‘gich bilan qo‘lda ishlaydigan moslamaga qaraganda ko‘proq sut sog‘ib olish mumkin» - bu doim ham to‘g‘ri emas. Sut miqdori ayolning fiziologiyasi va sog‘ishning muntazamligiga bog‘liq.
• «Qo‘lda ishlaydigan sut sog‘gich samarasiz» — to‘g‘ri foydalanilganda u ham yaxshi natija beradi.
• «Sut sog‘gich ko‘krak uchida yoriqlar paydo qiladi» — bu ko‘pincha voronkaning noto‘g‘ri tanlanishi yoki sog‘ish texnikasining buzilishi bilan bog‘liq.
• «Sut sog‘gich tez-tez ishlatilsa ko‘krak «dangasalashib qoladi»  — sut sog‘uvchi moslama bilan sog‘ib olish tufayli sut ishlab chiqarilishi to‘xtab qolmaydi. Aksincha, to‘g‘ri sog‘ish laktatsiyaga ko‘maklashadi va uni rag‘batlantiradi.

Shunday qilib, qo‘lda yoki elektrda ishlaydigan sut sog‘gichlar o‘rtasidagi tanlov – bu qulaylik, xarajat va kutilayotgan foydalanish tezligini muvozanatga keltirishdir. Eng muhimi, hech qanday sut sog‘gich tabiiy emizishning o‘rnini bosa olmasligini esda tutish lozim. Ammo u turli hayotiy vaziyatlarda ona sutini saqlash uchun ajoyib yordamchi bo‘lishi mumkin.